أيوه.. الكلام ده عشان الليد والليده، أني عارفة أنهم بيزعلوا مني بس لازم من قرصة الادن هادي والا بتكون بعوله على اصوله داخل الحرم الجامعي.
مليه خلاص مش لهادي الدرجة الاناقة حقكم، ايش الدي بتستفيدوا من الكرنفال هاذا؟! البنت واجيه تقولوا بطله فيلم بكامل زينتها، والولد داخل الحرم الجامعي ولابس شورت لاصق بجسمه بقي مثل عود القطن حق الاذون…
مليه اني دارية أن الجامعة بالنسبة لكم تعتبر منعطف تعليمي وفكري كبير بس مايكونش منعطف بحري كذا!.
اني مقدره انكم جيتم من بيئة التزام ونظام في المدرسة بس دا ما يعطيكم مبرر تتصرفوا زي ماوكلي اول ماشاف مخلوق بشري مثله.
الحرم الجامعي له احترام ووقار خاص، انتم واجيين تاخدوا خلاصه جهد بذله علماء وكتاب ومفكرين من سنين، وكمان واجيين عشان تلعبوا نفس دورهم وتصقلوا مواهبكم وتتناولوا العلم بطريقة البحث والتحليل والتطبيق الواقعي.
هو مش دور كوميدي هزلي، لا بالعكس هو دور جاد جدا لان هادا الدور هو الدي بياهلكم لادارة حياتكم في المستقبل القريب وكمان بيحدد مستوياتكم الوظيفية والاجتماعية بين افراد المجتمع.
يعني الألوان الفاقعة على وجهك وفي لبسك يابنتي مكانها مش الجامعة، مكانها البيت أو نادي الأعراس، أما هنا في الجامعة فلازم تكوني معتدلة في تصرفاتك ومظهرك وكلامك وأرائك لان شخصيتك الناضجة يبدأ ظهورها من هناء من دا المكان المقدس لأنه محراب علم مش ركن موضة.
وصدقيني هادا الكلام عشان الليد داك المستهتر ما يتجرا عليك ولو بنظره، وبعدين الحلاوة دي كلها مش لازم تبقى معروضة كذا للي يسوى وما يسوى.. عشانك وعشان مقامك في صرح العلم الدي بيشكل فكرك المستقل.
