قد كنا فرحنا واتعرفنا على الكهرباء من جديد وجلسنا معها رغم الحساد والشواني.. بس فجاه اتغير الحال ورجعت حليمة لعاداتها القديمة... طيب ياجماعة الكهرباء هادي لمتى بتجلسوا تدادُنه وترقصُنه على نغمه (... امانتك وغزال تمشي دلا..)؟!
طيب فهمنا أزمة مشتقات وأزمة مولدات وخبر من دا اللي ما ياكلش عيش، بس الناس ضاقت، ضبحت، خرجت من ثيابه.. مثلاً أمس احترق المولد عند الجيران ولولا رحمة الله كانت استوت كارتة، وقبلها كثير مولدات أو بطاريات طاقه شمسيه تسبب حرائق وخسائر بسبب انطفاء الكهرباء.
طيب نحنا والله مجتمع متفهم ومطيع وزي الحلاوة، يعني نفهم أن مسائل فنيه كثيرة تمنع وجود التيار الكهربائي بشكل مستمر، لكن كمان نحنا مش بهادي السذاجة عشان نصدق أن انطفاءها من ثمان! عشر! إحدى عشر ساعة في بعض المناطق أمر عادي ولازم نستوعبه.. على الأقل تراعوا إن عدن ما تعرفش حاجه اسمه الفصول الأربعة.. لان نحنا عندنا صيف وخريف بس، انما الشتاء والربيع هادوم خلوهم لأصحاب المناطق السياحية الجميلة في أنحاء الوطن.. خلونا في عدن الآن، عدن العاصمة الاقتصادية، عدن العاصمة السياسية المؤقتة، عدن العاصمة السياحية،.. عاصمة المتغيرات السياسية والثقافية... معقول تكون عدن كل دا في الظلمة؟!!.... عدن بلا كهرباء قرية كبيرة ممكن يعبث بأمنه أي قليل مسؤولية.. عدن قنديل اليمن ياجماعة والقناديل ما يكون لها قيمة إذا ما تبقى مضيئة.
انقطاع الكهرباء بالنسبة للطلاب والمثقفين وأصحاب العقول النيرة يعني انقطاع لحبل الأفكار والرؤى والطموحات العملاقة... انطفاء الكهرباء في عدن جريمة لأن إنطفائه عملية موت بطيء للناس... قد الناس بعد الكهرباء قرحت فيوزاته تزيدوا تقرحوا فيوزات الناس... قد الناس بعد الحرب نص خمده والكهرباء غلقت الباقي..
