بعض الناس يحبوا الفحس زي ما يحبوا الرز والصانونه، مليه هادوم من فين نجيلهم؟!! لامعاهم وجه ولاقفا!!! والله صحيح لما يقول لك: هم يضحك وهم يبكي.. يعني تلاقيهو يتكلم عن الأمانة وهو أبو الخيانة، ويصور لك الصدق وهو أبو الكذابين.. هيا مليه وكيف، الناس هادوم كيف عايشين؟!! طيب مليه أني داريه أنهم طواهيش ويعرفوا يجزعوا نفسهم بس يمكن ذا يحصل في السوق، في الشارع، بين الناس التافهين اللى عايشين سبهلله بلا هدف لكن بين المتعلمين، المتقين الفاهمين... لا ... ذا كثير...
عارفين ايش القصة؟! القصة أن أني في المستشفى من الساعة أربع العصر لممن ثمان الليل مراعيه لما الممرضة تصيّح لي ادخل عند الدكتور ومافيش فايده. قمت مشيت لا عند الممرضة أشوف متى بايجي دوري، خاف في خطأ وإلا شيء، قالت: مش أنت قد دخلتي؟!! قلت له لا، وشهدوا المريضات اللي جنبي أني مادخلتش، الممرضة طلبت مني انتظر لحظات فجلست وانتظرت تعرفوا فين طلع الخطأ؟!!
طلع أن في واحد يشتي يدخل زوجته ويخلص فيسع منشان يروح بيته، فقامت الممرضة بعد اطلاعه على الكشف بسرعة البرق اسم المدام: ألطاف!... وفتح لنفسه طريق لا عند الدكتور ودخل في دوري لأن دوره كان متأخر كثير... بالله عليكم دا ايش نقول عليه؟!.. طيب دي معقله وإلا فراهه وإلا نصب واحتيال...
اووووه .... أحرق سررك والله، لا وعاد الممرضة تزيد تقهرني وتقول لي: شفتي داك أبو الشعر الأبيض الذي كان لابس كرفته؟!! قلت له: ايوه.. ماله.؟! قالت: هيا هو داك الدي دخل زوجته باسمك!!!!!!!
والله لو شفتوا شكله تقولوا دكتور في الجامعة، صحيح لما يقول المثل: مش كل الذي يلمع ذهب، بس يالله دحين قد في ذهب صيني.
